Аяллын тэмдэглэл, Лондонд #6

Лондонд ирсэн хүмүүсийн зорьдог газруудын нэг Camden-д очиж үзлээ. Элдэв дээдийн этгээд, эрээн мяраан эд зүйлс зардаг газар байлаа. Манай рок зүгийн хамтлагийнхан очихоороо элдэв дээдийн гоёл чимгээ цуглуулдаг газар юм гэнээ.

Аяллын тэмдэглэл, Лондон #5

Бүтэн нэг өдрийг музейгээр эргэлдэж өнгөрүүлэв. Авууштай тал нь Лондонгийн томоохон музейнууд үнэгүй, нийтэд нээлттэй, тэгээд хүүхдийн сонирхлыг татахаар янз бүрийн арга хэмжээ, тоглоом энэ тэртэй. Зочилсон хүмүүс өдөржингөө тэнд эргэлдэж, хоол идэж, дэлгүүрээс нь элдэв бэлэг дурсгалын зүйлс авч хөөрхөн орлого олчихдог.

Coldplay зэрэг алдартай олон хамтлаг дуучдыг хариуцдаг Warner Music Group

New rulers of the world - үзүүштэй баримтат кино

Ийм нэртэй 2001 оны баримтат кино үзсэн.

Хэрхэн капиталист өндөр хөгжилтэй орнууд хөгжил муутай ядуу буурай орныг эдийн засгийн аргаар шулж мөлждөг, боолчилдог талаар Индонезийн жишээн дээр харуулсан.
"Эрт дээр цагт цөөн тооны хаад ноёд засгийн эрхийг барьж, эд хөрөнгө, эрх мэдэлтэй байдаг байсан бол орчин үед тэр нь цөөн тооны том корпорациудаар солигдсон..."
"Одоогийн эдийн засгийн машин нь мөнгөтэй нь мөнгөө үржүүлж, улам баяжих, мөнгөгүй нь улам ядуурахад хүргэдэг баячуудад ашигтай ..."
Хэдий манай орон Индонез болон зүүн өмнөд Азийн бусад орнууд шиг Nike, Gap, etc барууны том брендийн бүтээгдхүүнийг үйлдвэрлэж өгдөг үйлдвэрүүдгүй ч Монголд баян ядуугийн ялгаа улам ихсэж яг л тэр орнуудын хойноос ороод байгаа юм санагдана.. Манай оронд олноор амьдардаг Ихмэдэх болон Үлмэдэхүүд үзээсэй...Энэ киног үзээд макро эдийн засаг судалмаар санагдав. Үзэх, харах, унших, уух, идэх юм их байна шүү, яаж амжуулнаа...

Аяллын тэмдэглэл Лондонд #4

Лондон Истанбул хоёр цаг агаарын хувьд ойролцоо, гэхдээ Лондонд хаа очиж бороо шаагитал асгарсангүй, хааяахан зүсэрснээс цаашгүй аятайхан байлаа.

Kensington High Street

Royals by Lorde - зэвүүн үгтэй юмаа

2015 оны мастер план

2014 онд биелээгүй болон амжаагүй ажлууд 2015 онд гулсаад орж ирсэн болно. 

• Зургийн дугуйланд явж, гоё зураг зурж гэртээ өлгөнө. Цагаан сарын дараа эхлэхээр болсон. - явж эхэлсэн, хар зураг бол гайгүй шүү. Харин усан будгаар будна гэдэг амар ажил биш байна лээ. 
• Хөмрөгийн гуравдах номыг 2014 оны 5 сард дуусгасан, хэвлэлээс ирээгүй л байна. 
• Өөрийн номоо бичиж эхлээгүй ээ, Аньс ажиллагаатай нэгтгээд энэ жил нэг орчуулгын ном гарганаа. 
• Монголдоо аялах.
• Гадагшаа аялах. 
• PMP авах. 
• Цэлмүүн балетанд явахаас залхуураад хөл өвдөөд байдаг гээд больсон. Харин долоо хоногт ганц цаг төгөлдөр хуур нүдээд, хүүхдийн 3 - 4 ая тоглодог болсон шүү. Хүү энэ жил нэмэгдэнэ. 
• АС ажиллагаа.
• 15 онд унших номын жагсаалтаа гаргах.
• Долоо хоногт 1 цаг гүйх...

Энэ жил их даруухан төлөвлөгөө гаргалаа. :)

2014 оны төлөвлөгөө энд бий. 

Аяллын тэмдэглэл Истанбулд #3

Grand bazaar-ыг сонирхсон, манай Нарантуулыг гүйцэхгүй санагдсан.

Орой Лондон нисэх байсан тул тасалбараа шалгатал хоёр өөр онгоцоор нисэх болж таарлаа. Цуг яваа хүмүүс өөр билетийн агентаар тасалбараа захимааргүй юм билээ.
Турк орны тухайд бороо байнга орж жаахан зутарсныг эс тооцвол хоол унд сайтай, сүм хийд ихтэй сайхан л улс санагдлаа. Дараа тухтай ирж үзэсгэлэнт газруудаар аяланаа.

2014 онд уншсан номууд

2013 оныхоо номуудыг review бичиж амжаагүй байтал жил өнгөрчихжээ. Хамгийн таалагдсанаас нь эхлээд л review бичнээ л гэчихсэн байгаа.

Аяллын тэмдэглэл Истанбулд #2

Буудлын өрөө маань буудлын ар руу харсан умгар цонхтой, жижигхэн өрөө болж таарав. Анх захиалахдаа өндөр давхарт гэж захисан ч 2 давхрын өрөө өгчихсөн байсан ч нэхэл дагал бололгүй орхилоо. Угаасаа ирж унтахаас өөрөөр удаан байх биш.

Эртлэн босож өглөөний цайгаа уучихаад гартал бороо асгаж байлаа. Истанбул тийм хүйтэнгүй ч өдөржин бороотой байсан тул жаахан зутарч, хоолой өвдсөн. Шүхэр бариад гараад алхаж гарлаа. 

 Иймэрхүү жижигхэн гоёмсог байшин хаа сайгүй

Аяллын тэмдэглэл - Онгоцонд #1

Turkish Airlines-р Истанбул руу нисч  замдаа Бишкекийн Манас онгоцны буудлаас түлшээ цэнэглэлээ. Манайхтай адилхан санагдсан зүйлсээс дурдвал авсаархан онгоцны буудал, хүмүүсийн царай зүс, дэлгүүр дэх Киргиз гар урлал, эсгий шаахай гээд олон байлаа. Харин манай онгоцны буудал дээр Мөнгөн завьяа гээд хаа сайгүй байдаг дотоодын алт мөнгөн эдлэлийн дэлгүүр нээвэл их дажгүй байх юм шиг санагдсан.

The Perks of being a Wallflower

Энэ зохиолд дотны найз нь амиа хорлож, хайртай эгч нь нас барсан болон бас бус явдлуудаас болж сэтгэл санаагаар хямарсан, дуугүй даруухан хүү Чарлигийн тухай өгүүлнэ. Санамсаргүй тохиолдлоор тэр дээд ангийн охин хүү хоёртой найзлах болсон нь түүний нэгэн хэвийн амьдралыг орвонгоор нь өөрчилжээ.

Чарлигийн ном унших дуртайг анзаарсан уран зохиолын багш Билл түүнд өөрийгөө олоход нь туслахуйц янз бүрийн сэдэвтэй номуудыг уншихыг даалгадаг байлаа. Тэр номын жагсаалт дажгүй санагдсан, уншихаар төлөвлөсөн зохиолуудаа хараар тодрууллаа.

Иван Денисовичын амьдралын нэг өдөр

Солженицыны Гулаг Ольтригийг уншиж дуусаад удаа ч үгүй байхад энэ номыг уншихыг нэг найз маань санал болгосон юм. Аа мэднэ, мэднэ саяхан ийм тийм ном уншсан гээд би тэр номыг нь авсан ч ширээн дээрээ сар гаруй хадгалсны эцэст нэгэн амралтын өдрийн өглөө эхлээд орой нь дуусгаж билээ.
Энэ тууж зохиолчдоо Нобелийн шагнал авчирсан бөгөөд Гулаг Ольтригийн нэгэн адил Оросын цөллөгийн бодит байдлыг ний нуугүй, энгийнээр өгүүлсэн ч ялгаатай тал нь зохиол Иван Денисович хэмээх эрийн нэгэн өдрийн амьдрал маягаар бичигджээ.

2014 онд хийх зүйлс

• Долоо хоногт нэг удаа тогтмол усанд сэлэх. Тогтмол сэлж эхэлснээс хойш уушигны багтаамж сайжирч, уул хад руу авирахад ч ядрах нь багассан байсан.
• Долоо хоногт нэг удаа 20-30 минутаар гүйх.
• Ногоо жимс их идэж, махаа багасгах.
• Зургийн дугуйланд явж, гоё зураг зурж гэртээ өлгөнө. Цагаан сарын дараа эхлэхээр болсон.
• Хөмрөгийн гуравдах номыг эхний улиралд багтаж дуусгах.
• Өөрийн номоо бичиж эхлэх. Ядаж нэг цэг тавинаа.